José Luis Calo pide ao Goberno municipal que supervise as obras e adopte medidas para evitar a dispersión de po e o arrastre de residuos cara ás redes de saneamento
AMES | O MILLADOIRO.– UCIN Galicia reclama ao Concello de Ames unha actuación inmediata ante a acumulación de restos de obra e escombros localizada en Agro da Vella, no Milladoiro. A formación municipalista asegura que esta situación está a provocar molestias entre os veciños da zona e reclama ao Goberno local que comprobe as condicións nas que se están executando os traballos e xestionando os residuos.
Segundo as imaxes trasladadas a UCIN Galicia, no contorno da vía acumúlase unha importante cantidade de materiais de construción, sen que, segundo a formación, se aprecien medidas suficientes para evitar a dispersión de po ou o posible arrastre de pequenos residuos.
O coordinador de UCIN Galicia, José Luis Calo, reclama ao Concello que actúe con rapidez e que exerza as funcións de control que lle corresponden.
“Os veciños non teñen por que soportar po, sucidade e escombros diante das súas vivendas. Se hai unha obra, ten que existir un control municipal sobre como se executa e como se xestionan os residuos. Non vale con facer obras: tamén hai que supervisalas”, afirma Calo.
UCIN pide comprobar o cumprimento da normativa
A formación lembra que os residuos procedentes da construción e demolición están sometidos a unha regulación específica e que a súa xestión debe realizarse cumprindo as correspondentes medidas de protección, almacenamento e retirada.
Neste sentido, UCIN Galicia solicita aos servizos municipais que comproben as condicións nas que están depositados os materiais, determinen, se procede, as responsabilidades correspondentes e ordenen a súa retirada.
A formación advirte tamén de que os episodios de vento poden favorecer a dispersión do po cara aos portais e vivendas próximas, mentres que as chuvias poden provocar o arrastre de pequenos materiais cara aos sumidoiros e ás redes de saneamento.
“A responsabilidade municipal tamén é controlar as obras”
José Luis Calo considera que o Goberno municipal debe ofrecer explicacións aos residentes e informar sobre as inspeccións realizadas na zona e as medidas que prevé adoptar.
“O alcalde e os responsables municipais teñen que estar pendentes do que sucede nas rúas. A xente paga impostos para ter servizos públicos e tamén para que exista control. O que non pode ser é que os veciños teñan que convivir cos problemas e sexan eles mesmos os que teñan que avisar unha e outra vez”, sinala.
Desde UCIN Galicia consideran que a situación en Agro da Vella debe solucionarse canto antes, tanto para recuperar as condicións de limpeza da zona como para evitar posibles molestias aos residentes e previr problemas derivados do arrastre de materiais.
“O cidadán quere solucións aos problemas que ten diante da porta da súa casa”, conclúe José Luis Calo.
