Un home faleceu na madrugada deste luns tras declararse un incendio nun alpendre anexo a unha vivenda situada no lugar do Sino, no concello coruñés da Baña.
Segundo informou o 112 Galicia, o aviso recibiuse arredor das 04:00 horas, polo que se activou de inmediato un amplo dispositivo de emerxencias. Ata o lugar desprazáronse efectivos dos Bombeiros de Santa Comba, persoal sanitario do 061, axentes da Garda Civil e outros servizos de apoio.
O lume calcinou por completo o alpendre, unha construción que no pasado fora utilizada como carpintería e na que aínda se almacenaba diversa maquinaria. A intensidade das lapas provocou tamén o derrubamento da cuberta do inmoble.
Durante os labores de extinción e de procura, os bombeiros localizaron no interior da edificación o corpo sen vida dun home.
Na vivenda principal residían unha nai e o seu fillo. A muller atopábase no exterior cando comezou o incendio e tivo que ser atendida polos servizos sanitarios debido ao forte impacto emocional sufrido. A vivenda apenas resultou afectada polas lapas.
Polo momento, descoñécense as causas que orixinaron o incendio, que permanecen baixo investigación. Será a Garda Civil a encargada de esclarecer as circunstancias nas que se produciu o lume e o falecemento da vítima.