A Praza do Concello de Carballo converterase nun dos grandes puntos de encontro da música urbana galega o vindeiro venres 26 de xuño coa actuación de 9Louro, un dos artistas galegos con maior proxección do momento. O músico muradán chegará á capital bergantiñá para presentar ao público o seu novo traballo discográfico, Amorrer.
Detrás do alias 9Louro atópase Martín Louro (2004), un artista que, malia a súa xuventude, xa conseguiu consolidarse como unha das voces máis destacadas da nova escena musical galega. O seu estilo mestura trap, electrónica e sons urbanos cunha identidade propia que conecta especialmente co público máis novo. Proba diso é o éxito das súas actuacións, nas que adoita colgar o cartel de entradas esgotadas.
No novo disco, Amorrer, 9Louro explora temas como o amor, o desamor, o sexo, as noites longas e a melancolía, construíndo un universo sonoro íntimo e emocional sen renunciar á forza dos ritmos electrónicos e ás influencias urbanas que caracterizan o seu proxecto artístico.
O concerto en Carballo promete ser unha das citas musicais destacadas do inicio do verán na comarca, cun directo no que o artista combinará os novos temas do álbum cos éxitos que o converteron nun fenómeno emerxente da música galega actual.
