O anuncio da futura construción da primeira residencia de maiores de Ponteceso foi presentado como un día histórico para o municipio. O proxecto, que prevé a posta en funcionamento da infraestrutura no ano 2028, contará con 140 prazas, apartamentos tutelados e a creación estimada de arredor de 90 postos de traballo.
Unha iniciativa que, sen dúbida, supón unha mellora importante na atención ás persoas maiores e que merece ser valorada positivamente.
Porén, o acto tamén deixou unha cuestión sen resposta que preocupa desde hai anos á veciñanza da Costa da Morte: a ausencia dunha ambulancia medicalizada para a comarca.
Mentres se anuncian investimentos para unha infraestrutura que tardará varios anos en ser unha realidade, continúan sen atenderse reivindicacións urxentes relacionadas coa asistencia sanitaria de emerxencia. En situacións nas que cada minuto pode marcar a diferenza entre a vida e a morte, moitos veciños consideran incomprensible que a Costa da Morte siga reclamando un recurso sanitario que outras zonas xa teñen.
A residencia é unha boa noticia. Ninguén o discute. Pero iso non debería impedir abrir o debate sobre outras necesidades igual ou máis urxentes. A atención ás persoas maiores non remata nun edificio: tamén require unha resposta sanitaria rápida e eficaz cando se produce unha emerxencia.
A cidadanía agarda que, coa mesma determinación coa que se presentan proxectos de futuro, as administracións dean resposta ás demandas sanitarias do presente. Porque unha residencia mellora a calidade de vida, pero unha ambulancia medicalizada pode salvar vidas.