A Coruña, 24 de xullo de 2026. O PSdeG-PSOE provincial da Coruña reclamou este venres ao Sergas a adopción de medidas urxentes para facer fronte á saturación das Urxencias do Complexo Hospitalario Universitario da Coruña (CHUAC), unha situación que, segundo denuncian, está a afectar tanto á calidade da atención sanitaria como ás condicións de traballo dos profesionais.
Os socialistas alertan de que a elevada presión asistencial obrigou a habilitar ata catro corredores para atender pacientes e aseguran que continúan inoperativas arredor de 130 camas hospitalarias, o que consideran unha mostra da falta de planificación da Xunta de Galicia para afrontar o incremento da demanda durante o período estival.
Desde o PSdeG-PSOE sosteñen que o Sergas non pode limitarse a afirmar que a asistencia se presta con normalidade, senón que debe adoptar medidas que permitan reducir a presión sobre o servizo de Urxencias. «A atención sanitaria non pode medirse unicamente polo número de persoas atendidas; tamén hai que valorar a calidade asistencial, a seguridade dos pacientes, a preservación da súa intimidade e as condicións nas que desenvolven o seu traballo os profesionais sanitarios», sinalan.
A formación reclama á Xerencia da Área Sanitaria da Coruña e Cee e á Consellería de Sanidade a activación inmediata dos recursos humanos e materiais necesarios para afrontar os picos de demanda. Entre as medidas propostas figuran o reforzo dos equipos de Urxencias e hospitalización, a cobertura adecuada das vacacións do persoal e a posta en funcionamento das camas hospitalarias necesarias.
Os socialistas advirten, ademais, de que a apertura de camas debe ir acompañada do persoal suficiente para atendelas. «Abrir camas sen profesionais é inútil, pero manter recursos pechados por non ter previsto os reforzos necesarios tamén evidencia unha falta de planificación que acaba repercutindo na asistencia», afirman.
O PSdeG-PSOE provincial tamén considera necesario fortalecer a Atención Primaria e os dispositivos de atención continuada para reducir a presión hospitalaria e mellorar a coordinación entre os distintos niveis asistenciais.
Finalmente, a formación acusa á Xunta de Galicia de coñecer desde hai anos os problemas estruturais do CHUAC sen adoptar as medidas necesarias para anticiparse aos períodos de maior demanda. Neste sentido, insta ao Sergas a abandonar a «normalización» da saturación das Urxencias e a desenvolver unha planificación que garanta unha asistencia sanitaria pública de calidade durante todo o ano, incluídos os meses de verán.