Mañá, ás 19:30 horas, celebrarase o Pleno Ordinario do Concello. APIN presentará nesta sesión tres mocións sobre asuntos que considera de especial interese para o municipio e dos que xa se informou previamente nesta páxina.
A primeira das iniciativas solicita a realización dun estudo sobre o parque eólico singular do Monte da Barda, propiedade do Concello, co obxectivo de coñecer o seu estado, posibilidades e a mellor xestión deste recurso municipal.
A segunda moción volve poñer sobre a mesa a situación dun muro situado nunha parcela en Somontes. APIN achega unha fotografía que, ao seu entender, resulta aclaratoria sobre a posible responsabilidade do Concello neste asunto e solicita que se adopten as medidas oportunas para o seu esclarecemento.
Por último, a formación pide que o anteproxecto destinado a previr as inundacións no municipio contemple dúas actuacións que considera prioritarias: a retirada da estación depuradora de augas residuais do centro da vila e a instalación de comportas na estrada de Carballido como medida para minimizar o impacto das inundacións.
Desde APIN sinalan que estas tres propostas buscan mellorar a xestión municipal, reforzar a seguridade da veciñanza e avanzar na planificación de infraestruturas e servizos de interese xeral.