A praia de Seiruga, un dos areais máis frecuentados do municipio de Malpica, está no centro das críticas de numerosos usuarios, que cuestionan as novas prohibicións impulsadas polo Concello mentres denuncian a falta de servizos básicos, entre eles a ausencia de socorrismo durante a tempada estival.
Os bañistas consideran que antes de establecer novas restricións sería necesario resolver os problemas que afectan ao día a día da praia. Entre as principais queixas figura a inexistencia de servizo de socorrismo e de baños públicos, unha demanda recorrente entre as familias que escollen este areal para pasar as súas xornadas de verán.
Pero as críticas non rematan aí. Os usuarios identifican catro cuestións que consideran prioritarias para mellorar a convivencia en Seiruga.
A primeira delas é a presenza de cans nas últimas horas do día. Algúns bañistas aseguran que, aínda que hai propietarios responsables, outros non recollen os excrementos dos seus animais, que quedan tanto na area como no camiño de acceso á praia, obrigando aos visitantes a extremar as precaucións.
Outra das preocupacións é a xestión dos residuos. Os habituais de Seiruga lembran que existe un colector destinado exclusivamente á recollida do lixo procedente do mar e insisten en que o lixo xerado polos propios usuarios debe depositarse nos contedores habilitados nas inmediacións ou levarse para a casa, apelando á responsabilidade individual para manter o areal limpo.
Os fumadores tamén forman parte do debate. A demanda non é prohibir fumar, senón pedir respecto polo resto dos usuarios, especialmente polas familias con nenos, e reclamar que todas as cabichas sexan recollidas para evitar que rematen enterradas na area.
Finalmente, a presenza de caravanas é outro dos asuntos que máis malestar provoca. Segundo denuncian varios usuarios, algúns destes vehículos permanecen varios días estacionados e ocupan máis espazo do necesario, deixando zonas libres para instalar mesas, cadeiras ou toldos. Consideran que o aparcadoiro de Seiruga é amplo e permite a convivencia entre todos os vehículos, pero reclaman un uso máis racional do espazo para facilitar o acceso ás numerosas familias que acoden diariamente cargadas con cadeiras, neveiras e outros utensilios de praia.
As críticas diríxense directamente ao Concello de Malpica, ao que lle solicitan que priorice a dotación de servizos e a resolución destes problemas antes de impulsar novas prohibicións. Mentres tanto, os usuarios insisten en que Seiruga continúa sendo unha das praias máis atractivas da comarca, pero cren que a súa conservación e convivencia dependen tanto da actuación da administración como da responsabilidade de todos os que a desfrutan