Ponteceso volverá encherse esta fin de semana de motos, actividade e ambiente festivo coa celebración dunha nova edición da Motofesta, organizada polo Motoclub Ángeles de la Noche. A cita reunirá afeccionados ás dúas rodas nun completo programa que combina rutas, exhibicións, xogos, gastronomía e música.
A programación dará comezo o venres 31 de xullo, ás 19.00 horas, coa apertura das inscricións. A noite continuará ás 23.00 horas cunha espectacular exhibición Stunt, unha das propostas máis agardadas polos afeccionados ao mundo do motor. A partir da medianoite, unha disco móbil será a encargada de poñer música á primeira xornada da festa.
O sábado 1 de agosto a actividade retomaráse ás 10.00 horas, coa reapertura das inscricións. Ás 11.00 horas terá lugar unha ruta pola Costa da Morte, que permitirá aos participantes percorrer algunhas das paisaxes da contorna ao volante das súas motocicletas.
Despois da ruta chegará o momento de repoñer forzas cunha churrascada, prevista entre as 13.30 e as 15.30 horas. A ración terá un prezo de 12 euros, mentres que a media ración custará 7 euros.
Xa pola tarde, ás 16.00 horas, celebraranse diferentes xogos e actividades de diversión para os participantes e asistentes. A emoción volverá ás 18.30 horas cunha nova exhibición Stunt.
Ás 20.00 horas terá lugar a entrega de premios, acompañada do primeiro sorteo de rifas. A programación continuará pola noite, ás 22.30 horas, cunha ruta con fachos polos arredores, unha actividade especialmente vistosa que percorrerá as proximidades de Ponteceso.
O programa nocturno rematará co segundo sorteo de rifas, ás 23.30 horas, e cunha nova sesión de disco móbil, que poñerá o punto e final á celebración.
A inscrición na V Motofesta ten un prezo de 25 euros e inclúe unha mochila, unha pañoleta, un adhesivo, unha bengala e unha ración de churrasco.
Con esta nova edición, o Motoclub Ángeles de la Noche aposta por volver converter Ponteceso nun punto de encontro para os amantes das motocicletas, ofrecendo unha fin de semana na que a paixón polas dúas rodas se combinará coa diversión, a gastronomía e o ambiente festivo.