A praia de Ézaro, no municipio coruñés de Dumbría, volverá converterse no escenario dunha nova edición da Festa da Praia, unha celebración que terá lugar durante a primeira fin de semana de agosto con propostas para todos os públicos, especialmente para os máis pequenos.
Os actos comezarán o sábado 1 de agosto, a partir das 16.00 horas, con talleres infantís de manualidades, xogos de habilidade para todas as idades e inchables. Ás 19.30 horas será a quenda do espectáculo ‘A Vela Circo’.
Xa pola noite, a programación trasladarase á Fervenza do Ézaro. A partir das 22.15 horas, os asistentes poderán gozar da música da formación Gallaecia Small Band, mentres que ás 22.30 horas terá lugar a tradicional iluminación da fervenza, un dos momentos máis especiais da celebración.
A programación continuará o domingo 2 de agosto con numerosas actividades para o público infantil. Entre as 12.00 e as 13.30 horas e, pola tarde, das 16.00 ás 20.00 horas, haberá propostas de TransPorta-Garabato de Xogos, talleres infantís de manualidades, inchables e xogos de habilidade para todas as idades.
Ao mediodía celebrarase unha gran sardiñada popular, acompañada da animación musical tradicional a cargo de Longarela.
Durante a tarde, a festa continuará con xogos tradicionais, animación musical con DJ Matrek e a actuación da orquestra Nueva Fuerza, que poñerá o broche musical a unha fin de semana pensada para gozar en familia e ao aire libre.
A Festa da Praia de Ézaro volverá así combinar actividades infantís, música, tradición e espectáculo nunha das contornas máis emblemáticas de Dumbría, coa praia e a fervenza como protagonistas dunha celebración xa consolidada no calendario festivo do municipio.