O lume, iniciado ás 7.15 horas deste domingo xunto á AG-55, mobilizou un amplo dispositivo de extinción
Un incendio forestal declarado na primeira hora deste domingo na parroquia de Oseiro, no municipio de Arteixo, quedou estabilizado pouco máis dunha hora despois de iniciarse, segundo informaron fontes da Consellería do Medio Rural.
O lume orixinouse arredor das 7.15 horas nunha zona boscosa situada nas proximidades da autovía AG-55, o que provocou que unha importante columna de fume fose visible desde distintos puntos dos municipios da contorna.
A presenza do fume tamén chamou a atención de numerosos condutores que circulaban pola AG-55 e por outras estradas próximas ao lugar do incendio.
Para facer fronte ás lapas, a Consellería do Medio Rural mobilizou un dispositivo composto por dous axentes forestais, tres brigadas e dúas motobombas, que traballaron na zona desde os primeiros momentos.
A rápida intervención dos medios de extinción permitiu estabilizar o incendio pouco máis dunha hora despois de declararse. As causas que provocaron o lume están aínda pendentes de determinar.