Os populares destacan a beleza dos murais realizados por artistas locais, pero lamentan a falta de actuación no resto das vivendas escolares e no seu contorno
O Partido Popular de Negreira puxo o foco no estado dalgúns edificios da vila e no que considera unha situación de «feísmo» que contrasta con outras intervencións artísticas realizadas no municipio.
Desde o PP destacan especialmente os murais que decoran distintos espazos do concello, que cualifican como «arte e fermosura feito con talento feminino», salientando o orgullo de poder desfrutar deste tipo de intervencións nas rúas de Negreira.
Porén, os populares cuestionan que ese mesmo interese pola mellora estética e pola conservación dos espazos non se trasladase ao conxunto das vivendas escolares e ao seu entorno.
«Que pena que non tivesen o mesmo interese co resto das vivendas escolares e o seu entorno en todos estes anos nos que seguiron negando a titularidade para actuar sobre el», sinalan desde a formación popular.
O PP considera así que existe un contraste evidente entre a aposta por determinadas actuacións de embelecemento urbano e a situación na que permanecen outros inmobles e espazos da vila. Para os populares, a mellora da imaxe urbana debería abordarse de maneira global, evitando que determinados edificios continúen contribuíndo á percepción de abandono ou deterioro.
A formación reclama, en definitiva, unha maior implicación na recuperación e posta en valor dos espazos públicos e edificios que forman parte da paisaxe urbana de Negreira, ao tempo que pon en valor o traballo das mulleres artistas que contribuíron a transformar visualmente distintos puntos do municipio.
Unha cuestión de prioridades
A crítica do PP céntrase tamén na titularidade das vivendas escolares, que, segundo denuncian, tería dificultado durante anos a posta en marcha de actuacións de mellora tanto nos propios inmobles como no seu contorno.
Os populares consideran que a situación evidencia a necesidade de buscar solucións que permitan actuar sobre estes espazos e mellorar a súa integración na vila, nun momento no que Negreira tamén aposta por intervencións artísticas e de embelecemento urbano.
