As xornadas desenvolveranse os días 25, 26 e 27 de setembro e combinarán palestras e coloquios con actividades culturais, deportivas e de lecer
Galiza Nova, organización xuvenil do Bloque Nacionalista Galego (BNG), celebrará esta fin de semana en Corcubión as súas XXXVI Xornadas de Verán, unha cita que reunirá a militantes e participantes arredor da análise da realidade da inmigración en Galiza.
Ao longo dos días 25, 26 e 27 de setembro, o programa abordará diferentes cuestións relacionadas cos movementos migratorios e coa súa incidencia social e política. Entre os temas que se tratarán figuran o capitalismo imperialista e os fluxos migratorios, a evolución demográfica, as políticas migratorias, o discurso xenófobo, a regularización e as loitas das persoas migrantes por unha vida digna, así como o papel da militancia nacionalista ante a inmigración.
As diferentes palestras e coloquios estarán protagonizados por investigadores universitarios, representantes sindicais e activistas especializados nos movementos migratorios, que achegarán diferentes perspectivas sobre unha realidade que a organización considera de especial relevancia para o presente e futuro do país.
Actividades culturais e deportivas
As Xornadas de Verán tamén reservarán espazo para actividades de carácter lúdico e cultural. O sábado 26 terá lugar unha visita guiada pola vila de Corcubión, ademais dun torneo de volei-praia e unha partida de xogo da chave, actividades destinadas a favorecer a convivencia entre as persoas participantes.
O programa pecharase o domingo 27 de setembro cunha subida guiada ao Ponte Pindo, seguida dun xantar colectivo.
Con esta nova edición, Galiza Nova aposta por combinar o debate político e social coa convivencia e o coñecemento do territorio, nunhas xornadas que este ano sitúan a inmigración e os movementos migratorios como eixo central da programación.
