Miguel Piqueras: «Non se pode gastar millóns en grandes obras mentres hai veciños que chegan de traballar e non teñen auga para ducharse»
Boiro. UCIN Boiro reclama explicacións ao goberno municipal pola situación que, segundo denuncia a formación, está a afectar ao servizo de abastecemento de auga no municipio, con cortes de subministración, problemas de presión e incidencias na rede.
A situación volveu agravarse esta noite, despois de que o Concello comunicase un corte xeral da subministración entre as 00:00 e as 06:00 horas, motivado, segundo a comunicación municipal, pola falta de auga e unha avaría na ETAP de Padrón.
UCIN reclama ao goberno local que informe «con total transparencia» sobre as causas da incidencia e que faga públicos os informes técnicos que permitan coñecer o alcance da avaría. A formación considera que a veciñanza debe dispor de información sobre o funcionamento da ETAP e sobre as medidas adoptadas para garantir a continuidade do servizo.
Críticas pola antelación dos avisos
Para UCIN, unha das cuestións máis preocupantes é tamén a escasa antelación coa que, segundo denuncia, se comunican algúns cortes.
«O Concello avisa aproximadamente unha hora antes de cortar a auga. Hai moitas e moitos traballadores das fábricas que rematan a súa xornada ás 23:00 horas e chegan á casa sen poder ducharse. Non se pode xestionar un servizo esencial desta maneira», sinala o coordinador local de UCIN Boiro, Miguel Piqueras.
A formación política defende que os cortes programados deben comunicarse con suficiente tempo para que os fogares afectados poidan organizarse.
«Non cuestionamos que Boiro necesite investimentos. O que cuestionamos son as prioridades. Primeiro hai que garantir os servizos básicos», afirma Piqueras.
UCIN pide información sobre a calidade da auga
Á situación dos cortes súmase, segundo UCIN, a preocupación pola calidade da auga na rede de Couto-Trebonzos. A formación asegura que unha analítica que figura no Sistema de Información Nacional de Auga de Consumo (SINAC) aparece coa cualificación de «NON APTA PARA O CONSUMO».
Neste sentido, UCIN solicita ao Concello que explique publicamente os resultados das analíticas, as medidas correctoras adoptadas e cal é a situación actual da rede.
A formación reclama tamén que se publiquen as analíticas da auga e que se informe das incidencias rexistradas no abastecemento municipal.
UCIN esixe a dimisión do concelleiro de Obras
Ante o que considera unha situación acumulada no servizo de abastecemento, UCIN Boiro anuncia que esixe a dimisión do concelleiro de Obras, Luis Ruiz, ao entender que debe asumir responsabilidades políticas pola xestión da área.
«Estamos falando dun servizo básico. Os cortes, as baixadas de presión e os problemas que se están producindo afectan directamente á vida diaria dos veciños. Desde UCIN Boiro reclamamos a súa dimisión como responsable da área de Obras», manifesta Piqueras.
A formación pide igualmente ao alcalde que explique publicamente que medidas se están adoptando, cal é o estado da rede de abastecemento e que investimentos están previstos para mellorar o servizo.
UCIN Boiro sinala que continuará reclamando información pública e fiscalizando a xestión municipal, así como trasladando ao Concello as demandas da veciñanza afectada polas incidencias no abastecemento de auga.
