Oscar Insua critica a falta de planificación da Xunta e reclama medidas para garantir o acceso ao servizo e facilitar a conciliación das familias.
Santiago de Compostela, 21 de outubro de 2026. O deputado do BNG pola comarca, Oscar Insua, denunciou no Pleno do Parlamento galego a falta de solucións da Xunta para os 66 alumnos e alumnas que quedaron sen praza de comedor escolar nos CEIP Bergantiños e Fogar, en Carballo. En concreto, 37 estudantes do CEIP Bergantiños e outros 29 do CEIP Fogar están afectados por esta situación.
Durante a súa intervención, Insua criticou a falta de vontade política do Goberno do PP para resolver un problema que dificulta a conciliación das familias e advertiu de que «o comedor escolar non é un luxo, non é un privilexio e non debería ser unha lotaría».
O deputado nacionalista tamén puxo o foco na falta de planificación da Consellería de Educación, ao lembrar que as listas de agarda non son un problema novo, senón unha situación que se repite desde cursos anteriores. «As listas de agarda dun curso deberían servir para planificar o seguinte, non para volver empezar o curso cos mesmos problemas», reprochou.
As familias reclaman solucións e unha ampliación do comedor
Insua reclamou ao conselleiro de Educación, Román Rodríguez, que escoite as familias afectadas e poña en marcha medidas concretas. Como exemplo, referiuse ao escrito remitido polas nais e pais do CEIP Bergantiños, que solicitaron unha avaliación técnica das instalacións para estudar posibles obras de ampliación ou adaptación dos espazos.
A proposta das familias inclúe unha condición que o BNG considera fundamental: que a ampliación do comedor non implique perder a biblioteca escolar. O deputado lamentou a falta de resposta da Consellería a esta petición e cualificou de razoable a demanda das familias.
Unha representación das nais e pais do CEIP Bergantiños seguiu o debate desde a tribuna de convidados do Parlamento, acompañada polo alcalde de Carballo, Daniel Pérez, e polo concelleiro Ramón Varela.
Un problema que afecta á conciliación e á igualdade de oportunidades
O deputado do BNG advertiu das consecuencias que ten a falta de prazas de comedor na vida cotiá das familias, que se ven obrigadas a reorganizar os seus horarios laborais, buscar apoio doutras persoas para atender os seus fillos e fillas ou mesmo escolarizalos nun centro distinto do que lles corresponde por área de influencia para poder acceder a este servizo.
Neste sentido, Insua cuestionou a falta de igualdade de oportunidades que provoca esta situación, especialmente no caso das familias cuxo centro de referencia non dispón de comedor escolar. Segundo explicou, algunhas poden quedar sen praza no centro elixido por non ser o que lles corresponde territorialmente, a pesar de que o seu colexio de referencia non ofrece ese servizo.
«Señor conselleiro, onde está a igualdade de oportunidades?», preguntou durante a súa intervención parlamentaria.
O BNG propón modificar o decreto para corrixir a situación
Para solucionar esta situación, Insua instou a Consellería de Educación a modificar o Decreto 132/2013 a través da lei de acompañamento dos orzamentos da Xunta para 2027.
O obxectivo da proposta é corrixir as desigualdades que, segundo o deputado, sofren as familias que escollen un centro distinto do que lles corresponde porque o seu colexio de referencia non conta con servizo de comedor, e que posteriormente poden quedar excluídas ou en lista de agarda.
O BNG considera que a Xunta debe actuar tanto para ampliar a capacidade dos comedores onde sexa necesario como para revisar os criterios que dificultan o acceso ao servizo a determinadas familias.
Tras escoitar a resposta do conselleiro no Pleno, Insua lamentou que o Goberno galego non ofrecese solucións concretas para os 66 estudantes afectados en Carballo e criticou a súa falta de vontade para abordar un problema que repercute directamente na conciliación familiar e na igualdade de oportunidades no ensino público.
