O Concello de Ponteceso, en colaboración coa Xunta de Galicia, está a impulsar a recuperación de varias pistas forestais e camiños de Corme Aldea afectados polos incendios rexistrados en agosto de 2025. A actuación permitirá reconstruír un total de 1.900 metros de pistas forestais e acondicionar outros cinco tramos de camiños danados polo lume.
Os traballos teñen como principal obxectivo recuperar os accesos aos montes, mellorar as comunicacións nas zonas afectadas e reforzar a seguridade das aldeas. Ademais, permitirán facilitar o desprazamento e a intervención dos equipos de emerxencia e dos medios de extinción en caso de novos incendios forestais.
Desde o goberno local destacan que esta intervención responde ao compromiso adquirido coa veciñanza tras os incendios do pasado verán, que provocaron importantes danos na rede de camiños forestais da zona.
O alcalde de Ponteceso, Mato, subliñou a importancia destas actuacións para protexer a poboación e o territorio.
«Tras os incendios de agosto de 2025 comprometémonos coa veciñanza a traballar para recuperar os accesos aos nosos montes e mellorar a seguridade das nosas aldeas. A protección das persoas e das súas vivendas é, e seguirá sendo, unha prioridade para este goberno», sinalou.
Con esta intervención, Ponteceso avanza na recuperación das infraestruturas forestais danadas polos incendios e na mellora das condicións de prevención e resposta ante futuras emerxencias, especialmente nun territorio no que o mantemento dos accesos aos montes resulta fundamental para a protección das persoas, das vivendas e do patrimonio natural.
