A formación critica que a actuación actual se limite ao lavado e pintado exterior, mentres segue sen executarse o proxecto integral de mellora valorado en máis de 122.000 euros.
Alternativa dos Veciños de Fisterra denuncia que os traballos de lavado e pintado exterior do CEIP Areouta, cun orzamento de 32.453 euros máis IVE, non resolven os problemas de humidades, filtracións e illamento que sofre o centro.
A formación lembra que en setembro de 2024 quedara redactado un proxecto de rehabilitación integral por valor de 122.350,43 euros, que incluía illamento de fachadas e cuberta, drenaxe perimetral e renovación de canalóns e baixantes.
Desde Alternativa consideran que o colexio necesita solucións de fondo e non actuacións meramente estéticas.
«Pintar non é rehabilitar. O CEIP Areouta necesita investimentos reais, non parches», reivindican, reclamando que se acometa o proxecto integral para garantir unhas instalacións educativas dignas.
