
A agrupación APIN-ESCO de Ponteceso denuncia a falta de coordinación na planificación das obras realizadas no Malecón, onde hai aproximadamente un ano o Concello e a Xunta investiron uns 60.000 euros na eliminación da arborada existente e na construción dunha senda de cemento.
Segundo explica a agrupación, unha das actuacións previstas no futuro proxecto de prevención de inundacións contempla elevar o Malecón, polo que a senda recentemente construída podería ter que ser desfeita para executar os novos traballos.
APIN lembra que estas intervencións xa figuraban desde 2015 no ARPSI (Áreas de Risco Potencial Significativo de Inundación), polo que cuestiona que se realizase unha obra sen ter en conta unha actuación que xa estaba prevista.
Desde Faro da Costa queremos engadir outro aspecto relevante: as árbores eliminadas constituían un hábitat para numerosas aves e a zona está catalogada como ZEPA, polo que conta con protección ambiental. Ademais do seu valor ecolóxico, esta vexetación contribúe a fixar o terreo dos malecóns, absorber parte da auga e frear a súa circulación, axudando a reducir os efectos das enchentes.
A polémica tamén chega despois das explicacións do alcalde, quen, segundo APIN, restou importancia á posibilidade de ter que desfacer parte da obra ao argumentar que os cartos procedían principalmente da Xunta.
Desde a agrupación responden cunha mensaxe contundente: «Os cartos son de todos».
O caso abre interrogantes sobre a coordinación entre as administracións, a planificación dos investimentos públicos e o impacto ambiental das actuacións nunha zona especialmente sensible ás inundacións.
