A recente publicación de que trece concellos da área de Santiago abrirán oficinas de turismo con respaldo económico da Deputación da Coruña confirma unha tendencia clara: outros municipios están apostando polo turismo como motor de desenvolvemento, mentres Santa Comba segue sen unha estratexia definida.
Ames, Arzúa, Boqueixón, Melide, Negreira, Oroso, Padrón, Santiso, Teo, Touro, Vedra e O Pino recibirán financiamento para poñer en marcha servizos de información turística, nunha aposta coordinada por reforzar o seu posicionamento dentro da área de influencia de Santiago.
Porén, Santa Comba non figura entre os concellos beneficiarios, quedando novamente á marxe de iniciativas clave para a dinamización económica do territorio.
Esta situación resulta aínda máis preocupante se se ten en conta o contexto actual, marcado polo impulso da denominada “Vía Céltica”, un itinerario de peregrinación recoñecido polo Cabido da Catedral de Santiago que conecta os portos da Costa da Morte e Bergantiños con Compostela, xerando novas oportunidades turísticas na comarca.
Mentres outros municipios xa traballan na sinalización, promoción e aproveitamento desta ruta, en Santa Comba a realidade é ben distinta: ausencia de planificación, falta de infraestruturas e nula presenza nos proxectos turísticos que se están a desenvolver na contorna.
O contraste é evidente.
Outros concellos reciben financiamento, abren oficinas e constrúen relato.
Santa Comba, unha vez máis, queda fóra.
A pregunta xa non é se existe unha oportunidade, senón por que non se está a aproveitar.
