A futura circunvalación do polígono continúa avanzando. O trazado desta infraestrutura estratéxica recibiu a aprobación definitiva, un novo fito que achega a execución dunha actuación chamada a mellorar de maneira significativa a mobilidade e a accesibilidade da área empresarial.
A nova vía permitirá conectar directamente o polígono coas estradas de Ordes (AC-413) e Santiago (DP-1914), favorecendo unha circulación máis áxil e segura tanto para o tráfico pesado como para os desprazamentos diarios de traballadores e empresas.
Esta actuación constitúe unha peza fundamental para acompañar o proceso de ampliación do polígono industrial, facilitando o seu desenvolvemento futuro e incrementando a súa capacidade para atraer novos investimentos. Ademais, contribuirá a reducir os tempos de desprazamento, mellorar a distribución do tráfico e reforzar a competitividade do tecido empresarial asentado na zona.
Coa aprobación definitiva do trazado, o proxecto continúa avanzando na súa tramitación, consolidándose como unha infraestrutura clave para o crecemento económico e industrial do municipio e para responder ás necesidades actuais e futuras das empresas que desenvolven a súa actividade no polígono.