A Fervenza de Gosolfre, no concello de Mazaricos, é un dos recunchos naturais máis fermosos para descubrir a través da Ruta das Fervenzas. Un pequeno percorrido de apenas dous quilómetros permite internarse nun bosque autóctono e achegarse a varias caídas de auga, nunha paisaxe de gran beleza e marcado carácter galego.
A ruta parte dos campos de cultivo da aldea de Gosolfre, desde onde o camiño descende cara ás ribeiras dos ríos de San Paio e Santa Locaia. A medida que avanzamos, a frondosa robleda envolve o sendeiro e o son da auga convértese no principal acompañante da andaina.
O percorrido ofrece diferentes saltos de auga. O primeiro aparece como un impresionante tobogán natural moi vertical, escavado na pedra. Máis abaixo atopamos outra pequena fervenza, duns tres metros de altura, dividida en dous pola rocha.
A senda continúa afastándose por momentos do leito do río ata conducirnos á gran protagonista da ruta: unha espectacular fervenza de entre 15 e 20 metros de altura, que se precipita sobre unha ampla piscina natural rodeada por un bosque espeso e sombrío.
Este lugar fórmase na confluencia de tres cursos de auga: o río do Couto, o Rego Vao da Casa e o Rego de Gosolfre. A partir deste punto, as augas pasan a formar o río de San Paio, que continúa o seu percorrido ata desembocar na ría de Muros e Noia.
Unha ruta curta, pero que require precaución
A Ruta das Fervenzas de Mazaricos é un percorrido curto e accesible para o público en xeral, pero o terreo pode estar moi húmido e esvaradío, especialmente nas proximidades das fervenzas. O descenso ata a piscina natural presenta unha pendente pronunciada, polo que é fundamental avanzar con calma e extremar as precaucións.
A experiencia compénsase coa tranquilidade do contorno: o bosque, o río, as rochas cubertas de humidade e o continuo rumor da auga crean un escenario perfecto para gozar da natureza.
A volta pode realizarse polo mesmo camiño, completando así unha pequena escapada que permite descubrir un dos recunchos naturais máis atractivos de Mazaricos e da Costa da Morte.
