A Garda Civil desartellou un punto de venda de substancias estupefacientes na localidade coruñesa de Rois e detivo dous homes como presuntos autores dun delito contra a saúde pública, no marco da operación denominada “Kaut”.
A investigación, dirixida desde o seu inicio polo Xulgado de Primeira Instancia e Instrución número 1 de Padrón, desenvolveuse a partir das actuacións levadas a cabo durante a operación “Patineta”, cando os axentes detectaron a existencia doutro grupo dedicado presuntamente á distribución de drogas nas localidades de Noia, Outes e Muros.
Segundo informou a Garda Civil, as pescudas permitiron identificar dous veciños de Rois que supostamente se desprazaban a diario nun vehículo para distribuír substancias estupefacientes de maneira ambulante por diferentes municipios da comarca, co obxectivo de dificultar o labor policial e evitar o control das súas actividades.
Tras reunir numerosos indicios sobre a suposta actividade ilícita de ambos sospeitosos, os axentes procederon á súa detención. Posteriormente, realizaron un rexistro na vivenda vinculada aos investigados, onde localizaron 227 doses individuais de heroína preparadas para a súa venda e arredor de 4.000 doses de marihuana.
Ademais, durante a intervención incautáronse dúas armas curtas de fogo, unha delas municionada, así como diversa cartuchería compatible con ambas armas.
Ante estes achados, a Garda Civil imputou tamén aos detidos un segundo delito por tenza ilícita de armas e procedeu á incautación de todos os efectos atopados.
A Benemérita agradeceu a colaboración cidadá, destacando que a información achegada por varios veciños resultou clave para o desenvolvemento da investigación e o éxito da operación.
