Veciños de Corme Aldea, xunto coa asociación APIN Ponteceso, denuncian a situación de insalubridade que están a sufrir debido á falta de saneamento nunha das zonas da localidade. Segundo explican os residentes, o cheiro procedente das canalizacións é “insoportable” e está a afectar gravemente á vida diaria dos habitantes.
Os afectados aseguran que o Concello realizou recentemente algunhas actuacións, como a limpeza de varios rexistros e a rotura da tubaría en distintos puntos para facilitar o desaugue da auga acumulada. Porén, os veciños consideran que estas medidas foron insuficientes e que o problema continúa sen solución definitiva.
“Non podemos nin saír pasear pola rúa sen ter que aguantar este cheiro”, lamentan varios residentes, que denuncian ademais a presenza constante de malos olores durante gran parte do día.
Desde APIN Ponteceso reclaman unha intervención urxente e definitiva por parte do Concello para resolver os problemas da rede de saneamento e evitar que a situación continúe empeorando. Os veciños piden que se realicen obras de mellora reais e non solucións provisionais que, segundo indican, “non eliminan o problema de fondo”.
Mentres tanto, os residentes de Corme Aldea continúan convivindo cunha situación que consideran “insostible” e que afecta tanto á saúde como á calidade de vida da veciñanza.
