A Coruña, 26 de maio de 2026.- A Garda Civil do Posto Principal de Milladoiro-Ames, no marco da operación “MAGPIE”, investigou a unha muller de 45 anos, veciña de Santiago de Compostela, como presunta autora de delitos continuados de furto e malos tratos a persoas maiores e dependentes en distintos centros xerontolóxicos da comarca.
A investigación iniciouse a comezos do pasado mes de marzo tras a denuncia pola desaparición de diversas xoias pertencentes a residentes dun centro de maiores en réxime de internado. As pescudas permitiron comprobar que a sospeitosa era unha empregada do propio centro, encargada do coidado directo de persoas maiores e grandes dependentes.
Os axentes descubriron que varias das xoias subtraídas foran vendidas recentemente en diferentes casas de empeño dun municipio limítrofe. Despois de analizar os rexistros destes establecementos, constatouse que a investigada realizaba este tipo de vendas de maneira continuada desde o ano 2023, obtendo un beneficio económico superior aos 12.000 euros.
Segundo a Garda Civil, a actividade delituosa coincidía co desempeño das súas funcións laborais en distintos centros xerontolóxicos onde tamén se rexistraran furtos de características similares: tres deles situados en Santiago de Compostela e un no concello de Teo. Ademais, os investigadores non descartan a aparición de novas denuncias relacionadas con outros catro centros nos que tamén traballou.
As vítimas son persoas de avanzada idade, moitas delas con necesidades especiais de protección, elevado grao de dependencia e requirimento de coidados especializados. A investigación permitiu determinar que a presunta autora aproveitaba os momentos de aseo, alimentación e atención diaria para subtraer obxectos de valor.
Así mesmo, a Garda Civil tamén constatou comportamentos degradantes e abusivos cara ás vítimas durante a prestación dos coidados, menosprezando a súa dignidade persoal.
O instituto armado destacou a colaboración e implicación da dirección da residencia onde se presentou a primeira denuncia, que facilitou todos os medios necesarios para o esclarecemento dos feitos.
A operación “MAGPIE” concluíu coa plena identificación e investigación da sospeitosa, á que se lle atribúen, polo momento, sete delitos de furto e dous delitos de malos tratos. As dilixencias xa foron remitidas aos Xulgados de Instrución de Santiago de Compostela.
A Garda Civil reiterou o seu compromiso coa protección das persoas vulnerables, en especial no marco do Plan Maior Seguridade, destinado á prevención e persecución de delitos que afecten ao benestar das persoas maiores.