A resolución chega tras a denuncia presentada pola CIG ante a falta de actuación da empresa fronte ás agresións sufridas por varios condutores nos últimos meses.
A Inspección de Traballo requiriu a Monbus que elabore e implante un protocolo de actuación fronte ás situacións de violencia externa no servizo de transporte urbano de Santiago de Compostela. A resolución tamén insta a empresa a proporcionar formación ao persoal e a garantir o dereito de información e consulta da representación legal dos traballadores e traballadoras.
A decisión prodúcese tras a denuncia presentada pola FGAMT-CIG, que solicitou a intervención da Inspección de Traballo ante a falta de medidas por parte da empresa despois de varias agresións sufridas polo persoal do servizo nos últimos meses.
Un dos episodios máis recentes tivo lugar o pasado 29 de setembro, cando unha traballadora foi agredida durante a súa xornada laboral. Segundo denunciou a CIG, Monbus non activou ningún protocolo de actuación e mantivo a empregada conducindo durante varias horas despois do incidente.
O sindicato considerou que a empresa debería ter inmobilizado o autobús, solicitado asistencia sanitaria para trasladar a traballadora a urxencias e avaliado o seu estado de saúde. Pola contra, a empregada tivo que completar o servizo e, unha vez rematada a xornada, desprazarse polos seus propios medios ao centro de saúde.
*Antecedentes de agresións e falta de resposta empresarial*
Este non foi un feito illado. No mes de abril, outros dous condutores dos autobuses urbanos de Santiago sufriran agresións. Daquela, o comité de empresa solicitou unha reunión con Monbus para abordar os sucesos, pero a dirección anulouna en dúas ocasións e, segundo a CIG, non chegou a realizar ningunha investigación sobre o acontecido.
Ante esta situación, a FGAMT-CIG presentou unha denuncia perante a Inspección de Traballo para que investigase a actuación da empresa e determinase se cumprira coas súas obrigas en materia de prevención e protección da saúde laboral.
*A Inspección atende as demandas da CIG*
A resolución recibida pola central sindical require agora a Monbus que estableza un protocolo específico para previr as agresións e regular como debe actuar o persoal ante situacións de violencia externa. Tamén deberá garantir a formación das persoas traballadoras e a participación dos seus representantes legais na información e consulta sobre estas medidas.
Desde a CIG consideran que este requirimento pon de manifesto a situación de estrés laboral na que, segundo denuncian, traballa o persoal do transporte urbano de Santiago desde hai anos.
O sindicato agarda que Monbus cumpra as esixencias da Inspección de Traballo á maior brevidade e adopte as medidas necesarias para garantir a seguridade e a saúde das traballadoras e traballadores do servizo.
