A Parrillada Gardel de Arteixo recibe o Plato de Ouro 2026 de Radio Turismo

A gastronomía da provincia da Coruña conta cun novo recoñecemento. A Parrillada Gardel, situada en Arteixo, foi distinguida co Plato de Ouro 2026, un dos galardóns entregados por Radio Turismo durante a gala celebrada en Expourense, no marco da feira gastronómica Xantar.

O acto reuniu profesionais da restauración e da cociña de Galicia e Portugal. Nesta edición, os premios recoñeceron restaurantes das catro provincias galegas, cunha distinción adicional para Ourense por ser a provincia anfitrioa da gala.

Xunto á Parrillada Gardel, os establecementos galardoados co Plato de Ouro foron o Mesón O Ribeiro, na zona dos viños de Ourense; o Restaurante Muiñeiro, en A Valenzá (Barbadás); El Gastro de la Casona de Labrada, na Pontenova (Lugo), e El Niño Trasto, en Guillarei (Tui).

A gala tamén serviu para entregar os **Gorros Brancos**, cos que se distinguiu o labor de cinco profesionais da cociña. As persoas recoñecidas foron Ana Belén Fernández Rodríguez, do restaurante O Lar do Leitón; María Francisca Gomes Fernandes, do restaurante do Balneario de Cortegada; María Otilia Docampo Estévez, do restaurante Mantesil, na Rúa de Valdeorras; Normanda Costa, de Quinta do Paço, en Vila Real (Portugal), e Jorge Rama, do restaurante Enxebre, en Louro (Muros).

Este último recoñecemento pon tamén o foco na cociña da Costa da Morte, coa distinción a Jorge Rama polo seu labor á fronte dos fogóns do restaurante Enxebre, especializado en cociña á brasa.

Os premios de Radio Turismo buscan poñer en valor o traballo dos establecementos hostaleiros e dos profesionais que contribúen a manter e impulsar a gastronomía galega.