Santiago de Compostela, 19 de xullo de 2026. A Unidade de Policía Nacional Adscrita de Galicia (UPA), a través do Equipo de Resposta Policial (Erpol), e o servizo de Gardacostas de Galicia levaron a cabo, en colaboración coa confraría da Coruña, un operativo contra o furtivismo na costa da cidade herculina que rematou co comiso de 13 quilos de percebe.
O dispositivo, desenvolvido a comezos deste mes de xullo, permitiu identificar tres persoas que estaban a realizar extracción ilegal de percebe en zonas rochosas do litoral. Como resultado da actuación, os axentes tramitaron tres denuncias por infracción da Lei de Pesca de Galicia.
Segundo a investigación, os furtivos dirixíanse posteriormente a un establecemento dedicado á venda de produtos do mar para comercializar a mercadoría obtida de forma ilegal.
Este operativo enmárcase no reforzo das actuacións da Unidade de Policía Nacional Adscrita de Galicia, en colaboración coa Consellería do Mar e coas confrarías de pescadores, para combater o furtivismo e protexer os recursos mariños.
As actuacións céntranse tanto en impedir a extracción ilegal como na detección da venda, transporte e distribución de produtos pesqueiros obtidos sen cumprir as garantías sanitarias e a normativa vixente, co obxectivo de preservar os recursos mariños e garantir a seguridade alimentaria.