A Xunta de Galicia ampliará a partir deste venres a alerta vermella por calor a un total de 138 concellos, segundo os datos facilitados por MeteoSaúde e no marco do Plan de actuación fronte aos posibles efectos das altas temperaturas sobre a saúde.
A activación do nivel 3 de alerta (vermello) afectará ás zonas isoclimáticas do noroeste da Coruña, interior da Coruña, interior de Pontevedra, costa de Pontevedra (Rías Baixas) e á zona montañosa de Ourense, onde se agardan as condicións máis adversas debido ás elevadas temperaturas.
Ademais, a Xunta decretará o nivel 2 de alerta (laranxa) nas zonas isoclimáticas do suroeste da Coruña e na zona do Miño en Ourense.
Pola súa banda, o nivel 1 de alerta (amarelo) estará vixente no centro de Lugo, na montaña lucense, no sur de Lugo e na zona do Miño en Pontevedra.
Segundo as previsións, o episodio de calor continuará durante os vindeiros días en boa parte de Galicia, polo que as alertas polos posibles efectos adversos das altas temperaturas sobre a saúde permanecerán activas.
As autoridades sanitarias recomendan extremar as precaucións, especialmente entre as persoas maiores, menores, persoas con enfermidades crónicas e colectivos vulnerables. Entre as principais medidas figuran manter unha boa hidratación, evitar a exposición ao sol nas horas centrais do día e permanecer en lugares frescos sempre que sexa posible.