O proxecto das Cabanas Mirador do Ézaro contempla a construción de oito novas cabanas e un almacén, tras recibir o informe de impacto ambiental favorable
MAZARICOS, 10 de outubro de 2026. A Xunta de Galicia aposta por un modelo de turismo sostible e compatible coa conservación do patrimonio natural coa ampliación do establecemento turístico Cabanas Mirador do Ézaro, situado no lugar do Fieiro, na parroquia de Santiago de Arcos, no concello de Mazaricos.
A conselleira de Medio Ambiente e Cambio Climático, Ángeles Vázquez, visitou este sábado as instalacións, que recibiron o pasado mes de setembro un informe de impacto ambiental favorable. Segundo explicou, a ampliación non prevé efectos adversos significativos sobre o contorno, sempre que se cumpran as condicións ambientais establecidas na avaliación.
A responsable autonómica destacou a importancia de compatibilizar o desenvolvemento da actividade turística coa protección dos recursos naturais, a biodiversidade, as augas e a paisaxe, e puxo en valor o compromiso dos promotores que incorporan criterios ambientais aos seus proxectos.
Oito novas cabanas e un almacén
A actuación prevé construír oito novas cabanas e un almacén nunha parcela lindeira coas instalacións actuais, que dispoñen de sete inmobles en funcionamento, unha zona de servizos e un almacén. Este último será remodelado para convertelo nun novo espazo con capacidade para máis persoas.
A execución do proxecto estará condicionada ao cumprimento das medidas recollidas no documento ambiental, nos informes sectoriais analizados e no programa de vixilancia ambiental.
Entre os aspectos que deberán ser atendidos figuran a protección da atmosfera, da poboación e da saúde; a conservación das augas e dos leitos fluviais; a protección do solo e das infraestruturas; e a preservación do patrimonio natural e cultural.
O proxecto tamén deberá minimizar as posibles afeccións aos hábitats, ás especies de flora e fauna e á arborada autóctona, así como garantir a integración paisaxística das novas construcións e unha adecuada xestión dos residuos.
Máis proxectos turísticos sometidos a avaliación ambiental
Ángeles Vázquez salientou que o aproveitamento dos recursos naturais de Galicia debe desenvolverse desde o respecto ao medio ambiente e a conservación dos ecosistemas e da biodiversidade.
Neste sentido, a conselleira destacou que cada vez son máis os proxectos de campamentos turísticos que se someten a avaliación ambiental. Desde 2024, un total de 29 iniciativas deste tipo foron obxecto do procedemento de avaliación ambiental simplificada.
A Xunta defende así un modelo de desenvolvemento turístico que permita ampliar a oferta de aloxamento e favorecer a actividade económica no rural, garantindo ao mesmo tempo a protección do patrimonio natural galego.
