A iniciativa desenvolvida polo Concello contou cun investimento de 220.000 euros e permitiu acompañar preto dun cento de persoas desempregadas
Ribeira. A Xunta de Galicia puxo en valor en Ribeira o traballo desenvolvido a través dos Programas Integrados de Emprego (PIE), unha iniciativa que permite ofrecer novas oportunidades ás persoas desempregadas mediante itinerarios personalizados que combinan orientación, formación, acompañamento e contacto co tecido empresarial.
Durante o acto de clausura do Programa Integrado de Emprego desenvolvido polo Concello de Ribeira, destacouse o investimento de 220.000 euros realizado pola Xunta de Galicia, que permitiu acompañar preto dun cento de persoas desempregadas, adaptando os itinerarios formativos ás súas necesidades e ás demandas actuais do mercado laboral.
Ao longo do programa, as persoas participantes realizaron 335 horas de formación en diferentes ámbitos profesionais, entre eles cociña, caixa, ofimática, ferramentas dixitais, xestión administrativa e organización de almacén. Ademais, recibiron formación específica como acompañantes de transporte escolar e en mobilización de enfermos.
A iniciativa tamén permitiu reforzar a colaboración co tecido empresarial da contorna, facilitando o contacto entre as persoas participantes e as empresas e contribuíndo así a mellorar as súas posibilidades de acceso ao mercado laboral.
No acto, púxose especialmente en valor o papel dos concellos no desenvolvemento deste tipo de programas, pola súa capacidade para coñecer de preto as necesidades das persoas desempregadas e do tecido produtivo local.
No conxunto de Galicia, na convocatoria 2025-2026, a Xunta destinou máis de 10 millóns de euros aos Programas Integrados de Emprego. Esta aposta terá continuidade coa convocatoria 2026-2027, que contará novamente con máis de 10 millóns de euros para seguir impulsando a formación e a inserción laboral.
Durante a clausura tamén se salientou que detrás das cifras e dos investimentos hai persoas con proxectos vitais e profesionais que buscan novas oportunidades. Neste sentido, o obxectivo dos PIE é facilitarlles as ferramentas necesarias para mellorar a súa empregabilidade e avanzar cara a un emprego.
O acto contou tamén coa colaboración do alumnado do Centro Integrado de Formación Profesional Coroso, ao que se lle trasladou o agradecemento pola súa participación e contribución ao desenvolvemento da xornada.
A clausura serviu así para poñer en valor o traballo realizado ao longo do programa e o compromiso das administracións, das entidades e das empresas participantes coa mellora das oportunidades de emprego na contorna de Ribeira.
