Alternativa Enxebre expresou publicamente o seu apoio e solidariedade ao traballador municipal sancionado polo Concello de Arteixo e reclamou explicacións ao Goberno de Carlos Calvelo polas circunstancias que rodearon o conflito laboral.
A formación considera necesario esclarecer se a sanción puido estar relacionada coa actividade sindical do empregado e coa súa defensa dos dereitos dos traballadores. Segundo a versión do propio afectado, os feitos tiveron a súa orixe nun incidente fortuíto, sen intención de agredir ningún compañeiro.
Alternativa Enxebre tamén pide aclaracións sobre a posible vinculación política co Partido Popular do outro traballador implicado e reclama que se investigue se puido existir algún trato de favor.
Desde a formación insisten en que a actividade sindical non pode converterse nun motivo de represalia nin as afinidades políticas nunha vía para obter privilexios.
Finalmente, reclaman ao Goberno municipal transparencia, imparcialidade e igualdade de trato para todo o persoal do Concello, reiterando o seu apoio ao traballador afectado e defendendo a liberdade sindical e a dignidade dos empregados públicos.
