Mens volverá converterse nun dos grandes puntos de encontro do verán coa celebración das súas festas os días 24, 25, 26 e 27 de xullo de 2026. O programa inclúe catro intensas xornadas cheas de música, sesións vermú e grandes verbenas con recoñecidas formacións e DJs.
As celebracións arrancarán o venres 24 de xullo cunha primeira noite pensada para os amantes do baile, da man de Son de Festa, DJ Carlos e DJ Anxo Silva, que serán os encargados de inaugurar as festas cun ambiente cheo de ritmo.
O sábado 25, a música comezará xa ao mediodía coa sesión vermú protagonizada por La Mecánica. Pola noite, a formación regresará ao escenario para compartir cartel con Son de Festa e DJ Ariax, nunha verbena que promete manter a praza chea ata ben entrada a madrugada.
O domingo 26 será a quenda de Eric Hidalgo Prime, que ofrecerá tanto a macrosesión vermú como a gran verbena, converténdose no gran protagonista dunha xornada que promete animación sen descanso.
As festas despediranse o luns 27 de xullo cun programa de luxo. A sesión vermú correrá a cargo do Dúo La Fábula, mentres que a gran verbena final reunirá sobre o escenario a Panorama City, Son de Festa e DJ Luciano Macaro, poñendo o broche de ouro a catro días de celebración.
Con esta programación, as Festas de Mens 2026 apostan por unha combinación de orquestras, grupos e DJs para ofrecer unha ampla variedade musical e consolidarse como unha das citas festivas máis destacadas do verán na comarca.