A indemnización de 10.000 euros á secretaria e á interventora, a investigación dos pagamentos á Policía Local e o controvertido episodio do SOGAPS volven poñer o Concello no foco. A veciñanza merece explicacións sobre unha xestión que acumula demasiadas cuestións sen aclarar.
O Concello de Cambre parece non ter descanso. Cando unha polémica aínda non está resolta, aparece outra que volve situar a institución municipal no centro da actualidade. Condenas xudiciais, investigacións, conflitos administrativos, problemas na Policía Local e cuestións relacionadas coa transparencia están a debuxar un escenario que merece unha explicación pública.
A última controversia chega pola vía xudicial. A Xustiza condenou o Concello a indemnizar con 10.000 euros á secretaria e á interventora municipal por non previr o acoso denunciado por ambas funcionarias. Unha resolución que volve poñer sobre a mesa o grave conflito institucional vivido no municipio e a responsabilidade da Administración na protección do seu persoal.
Pero esta non é a única cuestión pendente.
A Policía Local e os máis de 673.000 euros baixo investigación
Outro dos asuntos que máis preocupación está a xerar é o relacionado cos pagamentos de horas extraordinarias á Policía Local entre 2020 e 2023.
O Tribunal de Contas cuantificou provisionalmente en 591.665,13 euros o principal do posible prexuízo ás arcas municipais, unha cantidade que, cos xuros, alcanza os 673.525,93 euros.
O procedemento sinala presuntas responsabilidades contables de antigos responsables políticos e, subsidiariamente, de varios mandos policiais. Os afectados anunciaron que recorrerán as conclusións.
Cómpre lembrar que se trata dunha liquidación provisional e non dunha condena firme.
A esta controversia súmase a falta de efectivos policiais, que obrigou o Concello a buscar fórmulas de colaboración con outros municipios para reforzar o servizo.
O episodio do SOGAPS: aceptaron unha reunión malia as advertencias previas
A semana pasada xa trasladamos os antecedentes do SOGAPS e as preocupacións existentes arredor da falta de transparencia neste asunto.
Un dos aspectos que merece unha explicación específica é que o Concello aceptase manter unha reunión do SOGAPS malia ter recibido previamente advertencias sobre esas preocupacións e sobre a necesidade de contar con información clara.
E aquí xorde unha pregunta que non debería quedar sen resposta: por que se aceptou avanzar cara a esa reunión sen aclarar previamente as cuestións relacionadas coa transparencia que xa foran advertidas?
Non abonda con manter reunións nin con transmitir unha imaxe de normalidade institucional. Cando existen dúbidas e advertencias previas, o que corresponde é aclaralas, facilitar a documentación pertinente e garantir que a cidadanía poida coñecer todos os detalles.
A transparencia non pode depender das circunstancias nin aplicarse só cando resulta conveniente.
Un problema que vai máis alá dunha polémica semanal
O que está acontecendo en Cambre merece unha reflexión máis profunda. Non se trata simplemente de acumular titulares nin de converter cada conflito nunha disputa partidista.
Falamos dunha institución pública que debe garantir o correcto funcionamento dos servizos, protexer o seu persoal, xestionar adecuadamente os recursos económicos e ofrecer información á veciñanza.
Cando se acumulan resolucións xudiciais, investigacións sobre fondos públicos e controversias administrativas, a obriga dos responsables municipais é dar explicacións convincentes e documentadas.
Cambre non pode vivir permanentemente pendente da seguinte polémica.
A cidadanía ten dereito a saber que acontece no seu Concello, que decisións se adoptan, que documentación as avala e quen asume as responsabilidades cando algo falla.
Porque os cartos públicos non son de ningún goberno, son de todos os veciños e veciñas. E a transparencia tampouco é unha opción: é unha obriga.
Cambre merece unha institución que dea respostas, non unha nova polémica cada semana.
