Carballo, 16 de xullo de 2026. O PSdeG-PSOE de Carballo criticou este xoves ao goberno municipal do BNG pola forma na que anunciou a instalación dunha pantalla xigante no aparcadoiro do Rego da Balsa para seguir a final do Mundial, ao considerar que a comunicación oficial evita calquera referencia explícita á selección española.
Os socialistas valoran positivamente que o Concello accedese finalmente a instalar a pantalla nun espazo público, unha medida que, segundo aseguran, chega despois das numerosas peticións realizadas pola veciñanza nos últimos días para poder seguir conxuntamente o encontro decisivo do campionato.
Con todo, a agrupación local considera que o executivo encabezado por Daniel Pérez tomou a decisión “a regañadentes” e cuestiona o cartel difundido nas redes sociais oficiais do Concello. Segundo sinalan, a imaxe empregada limita a súa comunicación a un balón e á información práctica do evento, sen incluír referencias a España, á selección nacional, aos seus xogadores, á camiseta ou á bandeira.
Desde o PSdeG-PSOE consideran “sorprendente” que se anuncie a retransmisión dunha final do Mundial disputada pola selección española “sen mencionar a España, sen empregar ningún dos seus símbolos e sen incluír unha soa mensaxe de ánimo”.
Ao seu xuízo, esta decisión responde a unha “incomodidade” do goberno municipal á hora de acompañar unha celebración que, segundo afirman, “moitos carballeses e carballesas viven con ilusión e absoluta normalidade”. Os socialistas sosteñen que a pantalla se instala pola presión social, pero que a presentación do acto evita identificar ao equipo que disputa a final.
Por este motivo, o PSdeG-PSOE pide ao executivo local que “deixe de lado os seus complexos e prexuízos ideolóxicos” e que represente “a toda a cidadanía” nun acontecemento deportivo destas características.
A agrupación conclúe que non reclamaba “ningún xesto extraordinario”, senón simplemente algunha referencia visual ou institucional á selección española, como unha imaxe do equipo, a bandeira nacional ou unha mensaxe de apoio aos xogadores que disputarán a final do Mundial.
