A parroquia de Cerqueda podería vivir este ano unha situación inédita nas festas de San Cristovo. Segundo transcendeu nas últimas horas, e ante a sorpresa de moitos veciños, non habería prevista ningunha verbena nin actos festivos debido á falta dunha comisión ou colectivo que asuma a organización.
A través das redes sociais, especialmente desde a páxina “Parroquia de Cerqueda”, numerosos usuarios amosaron a súa preocupación e tamén certa tristura ante a posibilidade de que desapareza, aínda que sexa temporalmente, unha das citas tradicionais do verán na parroquia.
Nos últimos anos fora a xa desaparecida Asociación de Veciños Monte d’Arxa quen asumira parte da organización dos festexos, cando menos mantendo a tradicional sesión vermú. Porén, moitos veciños aseguran non lembrar un ano no que San Cristovo quedase completamente sen celebración.
A situación abriu tamén un debate nas redes sociais sobre as dificultades actuais para organizar unhas festas populares. Entre as causas máis comentadas están a falta de relevo xeracional, o enorme esforzo organizativo que supón sacar adiante unha comisión, os custos económicos cada vez máis elevados ou a escasa implicación veciñal.
Moitos usuarios preguntan agora se o Concello de Malpica debería implicarse máis para evitar que se perdan unhas festas con tanta tradición e arraigo na parroquia.
Mentres tanto, a veciñanza permanece pendente de se nas próximas semanas aparece algún grupo disposto a intentar salvar, aínda que sexa a última hora, unha celebración moi querida en Cerqueda.