Na Costa da Morte acaba de nacer VITA, unha nova plataforma social e cultural que busca recuperar e conservar os valores cristiáns, as tradicións e a identidade propia dunha das terras con máis personalidade de Galicia.
Baixo o lema “As nosas raíces son o noso futuro”, VITA preséntase como un movemento aberto á sociedade, especialmente á mocidade, co obxectivo de fortalecer valores como a familia, a fe, o respecto, a solidariedade, a liberdade, o esforzo e o orgullo pola cultura galega.
Segundo explican no seu manifesto fundacional, VITA nace “nun mundo cada vez máis frío e individualista” como resposta á perda de identidade e ao afastamento das raíces culturais e espirituais que durante xeracións definiron á Costa da Morte.
“Non queremos unha xuventude sen raíces nin sen propósito. Queremos unha xuventude forte, consciente e orgullosa da súa identidade”, sinala o texto presentado pola plataforma.
O movemento define a Costa da Morte non só como un territorio, senón como “unha maneira de entender a vida”, reivindicando o espírito de sacrificio, valentía e unión que caracteriza ás xentes do mar e da terra.
VITA aposta tamén pola defensa da lingua galega, das tradicións populares e da espiritualidade cristiá entendida desde unha visión “próxima, humana e comunitaria”, afastada do odio e da confrontación.
Entre os seus principios destacan:
- A defensa da familia e da comunidade.
- A recuperación das tradicións e costumes galegos.
- O apoio á mocidade con identidade e valores.
- A promoción da solidariedade e do compromiso social.
- A importancia da fe como fonte de esperanza e humanidade.
O manifesto conclúe cunha chamada a “volver ás raíces, volver á identidade e volver a crer”, deixando clara a intención de construír unha comunidade activa arredor destes principios.
Con este nacemento, VITA Costa da Morte pretende converterse nun punto de encontro para persoas que buscan manter viva a esencia cultural, espiritual e humana dunha comarca marcada pola súa historia e polo seu carácter.