A pasada noite, Santa Comba viviu un amplo despregamento de controis de alcoholemia e tráfico por distintos puntos do municipio.
Porén, as críticas céntranse na falta de planificación do Concello. Moitos veciños pregúntanse onde está o servizo de taxis. Aseguran que é habitual pasar pola parada e non atopar ningún vehículo dispoñible, precisamente nas noites con máis afluencia de xente. Consideran que, se existen licenzas municipais de taxi, o Concello debería esixir uns servizos mínimos, especialmente durante as festas e as fins de semana.
As críticas tamén alcanzan ao alcalde, Romar, ao que acusan de vender un «cambio» que, segundo estes veciños, non chegou. Denuncian que se reforzan os controis para sancionar aos condutores, pero non se ofrecen alternativas de transporte para quen actúa con responsabilidade e decide non conducir despois de consumir alcohol.
A isto súmase a preocupación pola escasa presenza da Policía Local durante as festas. Segundo denuncian varios veciños, este sábado arredor das 18.00 horas produciuse unha pelexa en plena vía pública, un feito que consideran unha mostra da falta de vixilancia e prevención.
Entre as críticas tamén hai quen cuestiona a implicación do rexedor na seguridade viaria, chegando a afirmar que nalgunha ocasión foi visto utilizando o teléfono móbil mentres conducía. Trátase dunha acusación que non está acreditada e da que non consta confirmación oficial.
Para unha parte da veciñanza, Santa Comba está a perder a tranquilidade e a orde que sempre a caracterizaron. Consideran que non chega con facer controis de alcoholemia: tamén é necesario garantir un servizo de taxis operativo, reforzar a presenza policial e ofrecer unha xestión que dea resposta aos problemas reais da cidadanía.
As críticas evidencian o malestar dunha parte dos veciños, que reclaman menos propaganda e máis solucións para a seguridade e a mobilidade no municipio.