A Garda Civil investiga unha persoa como presunta autora dun delito continuado de sabotaxe nas instalacións ferroviarias de FEVE, en Senra, no termo municipal de Ortigueira (A Coruña).
A Garda Civil esclareceu un total de sete episodios de sabotaxe rexistrados na vía férrea ao seu paso polo municipio de Ortigueira, uns feitos que chegaron a poñer en grave risco a circulación dos trens e a seguridade dos viaxeiros.
A investigación iniciouse a raíz das denuncias presentadas por ADIF, despois de detectar en varias ocasións a colocación intencionada de bloques de formigón, troncos e outros obxectos de gran peso sobre as vías.
Entre os feitos investigados destaca especialmente a tala deliberada dun piñeiro de grandes dimensións, cuxa caída foi provocada cara á vía ferroviaria coa finalidade de obstaculizar o paso dos convois.
Os actos de sabotaxe obrigaron a interromper servizos ferroviarios e a mobilizar persoal técnico para retirar os obstáculos e garantir a seguridade da infraestrutura, ante o perigo que representaban para os trens e os seus pasaxeiros.
As investigacións realizadas polos efectivos do Posto da Garda Civil de Ortigueira permitiron identificar a persoa que presuntamente estaría detrás destes feitos.
Unha vez realizadas as actuacións policiais, as dilixencias foron remitidas ao Tribunal de Instancia de Ortigueira, onde continuarán as actuacións xudiciais correspondentes.
Os feitos investigados poderían ser constitutivos dun delito continuado de sabotaxe, sen prexuízo da cualificación xurídica definitiva que corresponda durante o procedemento xudicial.
Texto e fotografía: Garda Civil – Comandancia da Coruña
