Paderne, 28 de xuño de 2026.— Espazo Común Galeguista continúa avanzando na consolidación do seu proxecto político de proximidade, reforzando a súa presenza nos concellos galegos coa vista posta nos vindeiros retos electorais. Neste contexto, o presidente da formación, Pachi Vázquez, mantivo unha reunión de traballo con Miguel Longo, representante de Espazo Común en Paderne, co obxectivo de coordinar as liñas de acción política tanto a nivel local como autonómico.
Durante o encontro, ambos analizaron a situación política, económica e social do municipio e da súa comarca, facendo especial fincapé nas principais demandas da veciñanza e na necesidade de impulsar iniciativas que respondan aos problemas reais do territorio.
A reunión serviu tamén para avanzar na posibilidade de articular unha candidatura sólida, renovada e competitiva de Espazo Común en Paderne, un proxecto que pretende sumar persoas comprometidas coa realidade local e ampliar a súa influencia ao conxunto da comarca. A formación considera que existe un espazo político para unha alternativa baseada na proximidade, a transparencia e a boa xestión municipal.
«A forza de Espazo Común Galeguista nace da unión de persoas comprometidas coa súa terra. Paderne e a súa comarca teñen un enorme potencial que precisa dunha xestión ambiciosa, transparente e centrada exclusivamente nas necesidades da cidadanía», sinalou Pachi Vázquez ao remate da reunión.
Pola súa banda, Miguel Longo reafirmou o seu compromiso de continuar desenvolvendo un traballo constante de escoita activa a pé de rúa, incorporando novos apoios procedentes do tecido social, veciñal e profesional do concello. Entre as prioridades do proxecto destacan a defensa dos servizos públicos, a mellora das infraestruturas municipais, o impulso ao desenvolvemento económico e a creación de oportunidades que permitan fixar poboación no medio rural.
Con esta iniciativa, Espazo Común Galeguista reforza a súa aposta polo municipalismo como eixo fundamental da súa acción política, consolidando equipos preparados para ofrecer solucións eficaces ás necesidades específicas de cada territorio e construír unha alternativa de goberno baseada na participación cidadá e na defensa dos intereses de Galicia.