A plataforma pide coñecer o estado do expediente e reclama unha solución segura para recuperar a conexión peonil en Esteiro
A plataforma **«Esteiro en Pé» reclama á Demarcación de Costas en Galicia unha resposta á solicitude presentada o pasado 21 de setembro en relación coa situación da pasarela peonil de Evaristo, en Esteiro (Muros).
A entidade, representada por José Manuel Romero Rodríguez e David Fernández Lado, solicitou daquela unha reunión co xefe da Demarcación de Costas ou coa persoa responsable competente para coñecer directamente a situación da infraestrutura, as actuacións técnicas ou administrativas previstas, os posibles prazos e as alternativas existentes para recuperar unha conexión peonil segura.
Segundo sinala agora o concelleiro de Muros Centrado, Manuel Lago Álvarez, a petición da plataforma non tería recibido ata o momento unha resposta formal por escrito, pese ao tempo transcorrido desde a súa presentación.
A plataforma insiste en que a súa reclamación non pasa por abrir a pasarela se esta non reúne as condicións de seguridade necesarias, senón por buscar unha solución que permita recuperar a conexión peonil con garantías para a veciñanza.
Reclaman coñecer os prazos e as actuacións previstas
Entre as cuestións sobre as que se solicita información están o estado actual do expediente, as administracións competentes, as actuacións previstas e os prazos que se manexan para solucionar a situación da pasarela.
«Esteiro en Pé» tamén considera necesario coñecer se se están estudando alternativas provisionais que permitan restablecer unha conexión peonil segura mentres non se acomete a solución definitiva.
A preocupación pola situación da pasarela trasladouse ás diferentes administracións, ante a importancia que esta infraestrutura ten para os desprazamentos da veciñanza de Esteiro.
O concelleiro Manuel Lago pide explicacións a Costas
Neste contexto, o concelleiro Manuel Lago presentou un escrito ante a Demarcación de Costas no que solicita que se explique por que non se deu resposta formal á petición presentada pola plataforma e que se confirme se o escrito foi recibido, rexistrado e incorporado ao correspondente expediente administrativo.
Lago reclama tamén que se informe sobre a situación técnica e administrativa da pasarela e que se faciliten, na medida legalmente procedente, os informes existentes sobre as actuacións previstas para a súa reparación, rehabilitación ou reconstrución.
Así mesmo, pide que Costas dea resposta tanto ao seu escrito como á solicitude formulada por «Esteiro en Pé» o pasado 21 de setembro.
A plataforma considera fundamental que as administracións implicadas ofrezan información clara e transparente á veciñanza e que se avance cara a unha solución segura e definitiva para recuperar a conexión peonil en Esteiro.
