Malpica de Bergantiños, 21 de xuño de 2026.– A parroquia de Cambre, no Concello de Malpica de Bergantiños, viviu unha xornada festiva marcada pola gran afluencia de público na churrascada organizada pola Asociación Virxen do Desierto, que resultou todo un éxito de participación.
Ao longo do día servíronse máis de 300 racións, nun ambiente de convivencia e celebración que reuniu veciños, familias e visitantes arredor dunha proposta gastronómica que volveu demostrar o seu poder de convocatoria.
A programación arrancou cunha animada sesión vermú, que deu paso a unha tarde chea de música e bo ambiente. O tardeo, amenizado por DJ REDFACE, conseguiu manter a festa en marcha durante toda a tarde, converténdose nun dos momentos máis destacados da xornada.
Desde a Asociación Virxen do Desierto mostraron a súa satisfacción pola resposta do público e agradeceron a colaboración de todas as persoas participantes, voluntarios e colaboradores que fixeron posible o desenvolvemento do evento.
A gran churrascada consolídase así como unha das citas festivas máis importantes da parroquia, reafirmando o compromiso da entidade organizadora coa dinamización social e cultural de Cambre.
O balance final non pode ser máis positivo: unha excelente participación, un ambiente inmellorable e unha festa que deixou un magnífico sabor de boca entre todos os asistentes.