Santiago de Compostela, 24 de xullo de 2026.– A Xunta de Galicia mobilizará máis de 60 profesionais do Servizo de Prevención e Defensa contra Incendios Forestais (SPIF), xunto con medios aéreos e terrestres, para colaborar nas tarefas de extinción dos incendios forestais que afectan actualmente ás comunidades de Madrid e Castela e León.
Esta actuación enmárcase no contexto da declaración da Emerxencia de Interese Nacional realizada polo Goberno de España, co obxectivo de reforzar o dispositivo de loita contra os incendios nas zonas máis afectadas.
No día de onte despregouse na provincia de León un operativo integrado por 14 profesionais, un bulldozer e unha motobomba. Durante a xornada de hoxe, este dispositivo reforzarase coa incorporación dun helicóptero, unha brigada e dous axentes.
Pola súa banda, as comunidades de Madrid e Castela e León, especialmente a provincia de Ávila, recibirán dous helicópteros, seis brigadas, catro axentes, dous técnicos, un bulldozer e un posto de mando avanzado, cun operativo que poderá mobilizar arredor de medio cento de profesionais.
Con esta nova colaboración, Galicia volve amosar o seu compromiso solidario ante situacións de especial complexidade, mantendo ao mesmo tempo plenamente operativo o dispositivo autonómico de prevención e defensa contra os incendios forestais, que continúa en máxima alerta ao atopármonos na época de maior risco.
A cooperación entre comunidades autónomas constitúe un elemento fundamental para facer fronte ás grandes emerxencias, e Galicia conta cunha ampla experiencia neste ámbito. Ao longo dos últimos anos, equipos do SPIF participaron en múltiples dispositivos de apoio noutras comunidades autónomas e tamén en Portugal, como aconteceu durante os graves incendios rexistrados no ano 2017.
A Xunta reafirma así a súa disposición a colaborar sempre que sexa necesario, contribuíndo cos seus recursos humanos e materiais á protección das persoas, do patrimonio natural e do territorio fronte aos incendios forestais.