Esta fin de semana disputouse na Piscina Olímpica Municipal de Castellón o Campionato de España Open de Primavera de Salvamento e Socorrismo, unha das competicións máis esixentes do calendario estatal nas categorías xuvenil, júnior e absoluto.
Desde o Concello de Coristanco queren expresar o seu recoñecemento á deportista local Noa Rodríguez Pazos polos excelentes resultados acadados nun evento de máximo nivel competitivo.
A deportista coristanquesa proclamouse subcampioa de España nos 100 metros socorrista, e ademais acadou a medalla de bronce na proba de 4×25 remolque de maniquí por equipos, formando parte do seu club.
Estes logros poñen de manifesto o seu esforzo, constancia e compromiso, así como o traballo realizado polo seu equipo técnico e o seu club deportivo, claves no seu rendemento e evolución.
Con estes resultados, Noa Rodríguez Pazos consolídase como unha das promesas destacadas do salvamento e socorrismo estatal, converténdose nun referente do deporte local e nun exemplo para a mocidade de Coristanco, levando o nome do municipio a postos de honra no panorama deportivo español.
