Corcubión. O BNG de Corcubión denunciou publicamente os actos vandálicos cometidos durante a pasada fin de semana contra as faixas instaladas na avenida da Mariña. As pancartas, colocadas pola formación nacionalista, reclamaban a gratuidade da autoestrada AG-55 e anunciaban a celebración do Día da Patria Galega.
Desde o BNG consideran que estes feitos constitúen un ataque á liberdade de expresión e ao dereito das organizacións políticas a trasladar as súas mensaxes á cidadanía. A formación lamenta que este tipo de accións continúen producíndose e fai un chamamento ao respecto e á convivencia democrática.
«O debate político debe desenvolverse desde o respecto ás diferentes ideas, nunca mediante actos de vandalismo que só contribúen a deteriorar a convivencia», sinalan desde a organización.
O BNG de Corcubión apela ao civismo da veciñanza e reclama que se respecte tanto o mobiliario urbano como o material informativo das diferentes organizacións, independentemente da súa ideoloxía.
A formación nacionalista reafirma, ademais, o seu compromiso coa defensa da gratuidade da AG-55 e coa promoción dos actos conmemorativos do Día da Patria Galega, asegurando que continuará desenvolvendo a súa actividade política con normalidade e facendo chegar as súas propostas á cidadanía.