A formación nacionalista denuncia que a parada de autobús leva tempo cos vidros rotos e reclama ao Concello que a arranxe antes do inicio do curso escolar
Muxía, 8 de setembro de 2026.– O BNG de Muxía reclamou ao goberno municipal que proceda «con urxencia» á reparación da marquesiña da parada de autobús de Lourido, que permanece deteriorada e cos vidros rotos desde hai tempo. A formación nacionalista advirte de que esta situación afecta especialmente ás persoas usuarias do transporte público e, entre elas, ao alumnado dos centros educativos, que queda sen un espazo axeitado para resgardarse da chuvia.
Segundo explica o BNG, a reparación foi solicitada ao Concello en varias ocasións e por diferentes vías, entre elas a sede telemática municipal, conversas co executivo e os rogos e preguntas formulados nos plenos. A formación asegura que recibiu reiteradamente como resposta que os vidros xa estaban encargados, pero sinala que, a pesar do paso dos meses, os traballos aínda non se executaron.
O BNG considera especialmente preocupante a situación ante o inicio do curso escolar, previsto para este mércores 9 de setembro. «O tempo pasa e o arranxo non se fixo», sinala a formación, que considera que houbo tempo suficiente para acometer a reparación durante o verán.
A formación nacionalista tamén puxo o foco na localización da marquesiña, situada fronte ao Parador Costa da Morte. Para o BNG, resulta «paradoxal» que unha parada de autobús empregada pola veciñanza, incluído alumnado, se atope nun estado de deterioro tan evidente fronte a unha infraestrutura que cualifica como unha das máis luxosas do concello.
A portavoz municipal do BNG, Mercé Barrientos, criticou a falta de actuación por parte do goberno local. «Non podemos acreditar que o equipo de goberno deixe esta situación sen arranxar e que os nosos nenos e nenas teñan que permanecer á intemperie cando se podía ter actuado con previsión», afirmou.
Barrientos advertiu ademais de que, se as condicións meteorolóxicas son adversas, o alumnado continuará sen poder utilizar a marquesiña como refuxio. «Mañá pode chover e o alumnado de Muxía seguirá a descuberto por un único motivo: a falta de dilixencia e atención para con eles do goberno municipal», engadiu.
Desde o BNG lembran que esta non é a primeira vez que reclaman actuacións sobre as marquesiñas do municipio. En 2024, a formación xa solicitara ao Concello, daquela presidido por Santiago Toba, a reparación de varias paradas que presentaban un estado de deterioro. Segundo os nacionalistas, aquelas actuacións foran prometidas xa en 2022 e finalmente se procedera á substitución dos equipamentos danados.
O BNG reclama agora ao executivo municipal que resolva «canto antes» a situación da marquesiña de Lourido, especialmente ante o inicio do curso escolar e o incremento do uso do transporte por parte do alumnado.
