O deputado do BNG por Bergantiños e Costa da Morte, Óscar Insua, preguntará este xoves 28 de maio na Comisión 5ª de Sanidade, Política Social e Emprego do Parlamento galego sobre a dotación de persoal sanitario e administrativo coa que conta na actualidade o Centro de Saúde da Laracha, así como polas previsións da Xunta de Galiza respecto da súa mellora.
A iniciativa parlamentaria busca coñecer se o Goberno galego ten previsto reforzar os servizos asistenciais e administrativos deste centro sanitario, unha demanda que, segundo sinala o BNG, vén sendo trasladada pola veciñanza e polos profesionais ante o incremento das necesidades asistenciais no municipio.
Óscar Insua interesarase especialmente pola cobertura de prazas de medicina de familia, persoal de enfermaría e persoal administrativo, así como pola situación das substitucións e a carga de traballo que soporta actualmente o centro.
Desde o BNG consideran necesario garantir unha atención sanitaria pública “digna e de calidade”, especialmente en comarcas como Bergantiños e Costa da Morte, onde denuncian que a falta de profesionais está a provocar demoras na atención e dificultades para acceder a determinados servizos.
A pregunta será debatida na sesión da Comisión 5ª de Sanidade, Política Social e Emprego do Parlamento de Galicia prevista para este xoves 28 de maio.