Os nacionalistas aseguran que o colexio presenta problemas no tellado, canalóns, fiestras, humidades e instalacións do parque infantil
Coristanco, 22 de setembro de 2026. O BNG volve reclamar á Xunta de Galicia unha reforma integral do CEIP Canosa-Rus de Coristanco ante as deficiencias estruturais que, segundo denuncia a formación nacionalista, presenta actualmente o centro educativo.
O deputado do BNG por Bergantiños, Oscar Insua, rexistrou varias iniciativas no Parlamento galego para solicitar á Consellería de Educación que actúe e inclúa unha partida orzamentaria que permita acometer as obras necesarias durante o vindeiro ano.
A reclamación chega despois dunha reunión mantida este luns, 21 de setembro, por Insua e o portavoz municipal do BNG en Coristanco, Enrique Serra, con representantes da comunidade educativa. No encontro participaron Vanesa Tasende, membro da ANPA, e Xosé Abelenda, integrante do Consello Escolar en representación das familias, que trasladaron aos representantes nacionalistas as principais necesidades do colexio.
Segundo o BNG, o centro presenta diversas deficiencias, entre elas o estado do tellado, dos canalóns e das fiestras, así como problemas relacionados coa eficiencia enerxética do sistema de calefacción. A formación tamén denuncia a existencia de humidades e pingueiras cando chove, que obrigan a colocar caldeiros nalgunhas zonas do edificio.
Os nacionalistas lembran ademais que o pasado curso se produciu un incidente no teito dunha aula, onde se rexistrou un desprendemento parcial debido ao estado da cuberta. Así mesmo, durante a visita realizada este luns puideron comprobar que algún elemento do parque infantil, como o tobogán, permanecía precintado.
O BNG reclama unha partida para 2027
O portavoz municipal do BNG, Enrique Serra, sinalou que xa transcorreron dous anos desde que as deficiencias do centro foron trasladadas á Consellería de Educación. Segundo explicou, o Concello aprobou por unanimidade unha moción sobre esta cuestión, pero considera que as actuacións realizadas ata o momento non resolveron os problemas existentes.
Serra defendeu que a solución pasa por unha reforma integral do colexio e reclamou que os orzamentos da Xunta para o próximo exercicio incorporen unha partida específica para executar as obras.
O deputado Oscar Insua tamén reiterou no Parlamento galego a necesidade de que a Administración autonómica acometa as actuacións necesarias para mellorar as condicións das instalacións educativas.
Máis recursos para alumnado con necesidades educativas especiais
O BNG tamén puxo en valor as melloras rexistradas este curso no número de horas e profesorado destinado á atención do alumnado con necesidades educativas especiais.
En concreto, segundo os datos facilitados pola formación, o centro pasou de contar con 8 horas lectivas semanais de Audición e Linguaxe (AL) o curso pasado a 23 horas no actual.
No ámbito da Pedagoxía Terapéutica, o pasado curso o colexio dispoñía dun docente a xornada completa, mentres que este ano conta, ademais, con outro especialista a media xornada.
O BNG atribúe estas melloras ás reivindicacións realizadas durante os últimos anos e insiste en que, xunto co reforzo dos recursos humanos, é necesario actuar tamén sobre o estado das instalacións do CEIP Canosa-Rus.
