Os traballos de asfaltado que se están levando a cabo na autovía do Barbanza AG-11 provocan o peche dos enlaces de Lestrobe e Dodro, polo que se recomenda extremar a precaución e planificar os desprazamentos mentres duren as obras.
Especial atención require o enlace de Padrón, debido á configuración provisional da circulación e á anulación dalgúns carrís. A situación obriga os condutores a realizar manobras pouco habituais, especialmente no caso dos vehículos que circulan en dirección a Padrón, xa que deben efectuar un xiro ao rematar o carril habilitado en sentido contrario ao habitual.
Durante o paso polo carril de sentido contrario, é obrigatorio circular coas luces de cruzamento acesas e o límite máximo de velocidade é de 80 km/h.
Desde o ámbito da seguridade viaria recoméndase extremar a atención, respectar a sinalización provisional e adaptar a velocidade ás condicións da vía para evitar situacións de risco durante os traballos.
