Santa Comba continúa vivindo un clima de tensión política e social tras as declaracións procedentes do entorno do alcalde, nas que se sinala a existencia de páxinas e perfís falsos nas redes sociais co obxectivo de xerar crispación entre a veciñanza.
Porén, voces críticas co goberno municipal ofrecen unha versión distinta dos feitos. Segundo estas fontes, algúns dos perfís que estarían a xerar polémica poderían estar vinculados ao propio entorno do alcalde, sendo utilizados —aseguran— para lanzar mensaxes de confrontación, así como para insultar e desacreditar a persoas con posturas contrarias.
Entre os perfís sinalados atópase o denominado “Ana Clara Nayara Monteiro”, ao que algúns usuarios en redes sociais identifican como sucesor doutro perfil previamente activo, “Jordy Pascual”. Segundo estas mesmas voces, estes perfís estarían entre os máis activos nas críticas, especialmente dirixidas cara á exalcaldesa e ao seu entorno familiar, chegando a realizar afirmacións nas redes sociais que —segundo denuncian— non estarían demostradas.
Estas prácticas, segundo apuntan, terían tido maior impacto ao inicio da lexislatura, aínda que consideran que a situación mudou nos últimos meses, cun incremento da presión social. “Agora están acurralados”, sinalan algunhas das fontes consultadas.
A situación económica do Concello tamén forma parte do debate. Segundo denuncian, a débeda municipal non estaría a diminuír de forma significativa, mentres que negocios e provedores locais continúan á espera de cobrar polos servizos prestados, o que estaría a xerar preocupación no ámbito empresarial.
Este asunto xa fora tratado previamente por Faro da Costa, onde se recollían distintas posturas arredor desta polémica:
https://farodacosta.com/resposta-ao-entorno-do-alcalde-de-santa-comba/actualidad/
Polo momento, non hai unha resposta oficial por parte do goberno municipal respecto destas acusacións, nun contexto no que a tensión política e social segue en aumento no municipio.
