
A competición, impulsada xunto á burgalesa Carmen Pino, reúne 7.768 proxectos inscritos de 38 países e consolida a súa expansión internacional. Galicia achega 59 candidaturas e aspira a revalidar o título acadado en 2025 por Juan Carlos Pérez, fundador de Aldealista.
Santiago de Compostela, 20 de novembro de 2026. O emprendedor pontevedrés Tomás Garnelo e a burgalesa Carmen Pino impulsan a terceira edición da Impact Social Cup, unha competición que busca promover o emprendemento con propósito e dar visibilidade a iniciativas empresariais capaces de xerar un impacto positivo na sociedade. A convocatoria deste ano pechou cun total de 7.768 proxectos inscritos e 2.157 candidaturas completadas procedentes de 38 países, nunha edición que amplía por primeira vez a súa presenza a Latinoamérica.
A iniciativa consolida así o seu crecemento e a súa proxección internacional, apostando por modelos empresariais que combinan rendibilidade económica e transformación social. Garnelo defende que o impacto debe formar parte da propia razón de ser das empresas e non constituír un elemento accesorio.
«A viabilidade económica e o impacto social deben camiñar xuntos. Resolver problemas estruturais debe formar parte do propósito fundacional dunha empresa», sinala o emprendedor, que reivindica tamén o papel destas iniciativas como referentes para as novas xeracións fronte ao ruído das redes sociais.
En apenas tres edicións, a competición multiplicou por seis o número de inscricións respecto da súa primeira convocatoria, unha evolución que reflicte o interese crecente por modelos de negocio comprometidos cos retos sociais e ambientais.
Galicia, entre os territorios con maior participación
Galicia sitúase como a quinta comunidade autónoma con maior número de candidaturas nesta edición, cun total de 59 proxectos, por detrás de Madrid, Cataluña, Andalucía e a Comunidade Valenciana.
O ecosistema galego conta, ademais, cun precedente destacado: a vitoria en outubro de 2025 de Juan Carlos Pérez, creador de Aldealista, unha plataforma orientada a combater a despoboación e favorecer a revitalización do rural. O proxecto proclamouse gañador da segunda edición da Impact Social Cup nun evento celebrado no Madrid Arena ante máis de 3.000 asistentes.
A aposta polo territorio tivo continuidade o pasado mes de abril coa celebración do Impact Campus Galicia en San Xoán de Río, na provincia de Ourense. O encontro reuniu emprendedores, axentes locais e veciñanza para desenvolver propostas adaptadas ás necesidades do medio rural, co apoio da Xunta de Galicia e da Deputación de Ourense.
Os 64 semifinalistas coñeceranse en decembro
Tras o peche das candidaturas, un comité técnico integrado por representantes de fondos de investimento e entidades colaboradoras será o encargado de seleccionar oito proxectos por cada vertical da competición. Os 64 semifinalistas daranse a coñecer o vindeiro 9 de decembro no Auditorio Joaquín Rodrigo de Las Rozas (Madrid), nun acto que reunirá arredor de 600 asistentes e contará con entrada gratuíta mediante reserva previa.
A gran final celebrarase o 18 de xuño de 2027 en The Garage, no Autocine Madrid, cun formato de festival previsto para 5.000 persoas. Nela competirán os 16 proxectos finalistas, nunha cita que aspira a converter o emprendemento de impacto nun movemento cada vez máis visible e recoñecido socialmente.
Unha plataforma para transformar a sociedade
Fundada en 2024 por Tomás Garnelo e Carmen Pino, a Impact Social Cup é unha plataforma que, a través dunha competición anual, identifica, impulsa e dá visibilidade a proxectos empresariais capaces de contribuír á transformación social.
Nas súas dúas primeiras edicións, a iniciativa reuniu máis de 1.300 participantes e 6.500 asistentes presenciais, repartiu 200.000 euros en premios e construíu unha rede de máis de 80 entidades colaboradoras.
O seu obxectivo é converter as persoas que están a transformar a sociedade en referentes populares e promover unha cultura empresarial baseada no propósito, a colaboración e a creación de valor social.
