O PSOE da Laracha cuestionou publicamente a actuación do goberno municipal en materia de prevención de incendios forestais e reclamou ao alcalde, José Manuel López Varela, unha resposta «clara e directa» sobre o estado dos cortalumes no municipio.
Segundo denuncian os socialistas, durante unha recente intervención en Radio Nordés, o rexedor dispuxo de varios minutos para responder ás preguntas formuladas sobre a execución e planificación dos cortalumes, pero, ao seu xuízo, evitou abordar a cuestión principal.
«Cinco minutos. Ese foi o tempo que tivo López Varela para responder a unha pregunta moi sinxela: se os cortalumes da Laracha están feitos conforme á normativa ou se responden a outros intereses», sinalan desde o PSOE local.
A formación considera que a resposta ofrecida polo alcalde non aclarou as dúbidas existentes e lamenta que o debate derivase cara a cuestións alleas á realidade do municipio. «A nós non nos interesa unha clase de xeografía; impórtannos os veciños e veciñas da Laracha e a seguridade das nosas parroquias», afirman.
Por este motivo, os socialistas reiteran a súa petición de información e formulan novamente a pregunta ao goberno municipal: «Temos os montes protexidos ou non?». Ademais, insisten en que a prevención dos incendios forestais é unha cuestión prioritaria para a seguridade da cidadanía e reclaman transparencia sobre as actuacións realizadas.
«O noso monte non pode esperar por evasivas», conclúen desde o PSOE da Laracha, que agarda unha resposta concreta por parte do executivo local sobre o cumprimento da normativa e as medidas adoptadas para reducir o risco de incendios no concello.